CAGAK - Lembaran Budaya Padang Ekspres - Alah_Cair_Tehaer_tu_Sanak?
Carito Minang Kini

Alah Cair Tehaer tu Sanak?

Penulis : Ilham Yusardi   

Bulan puaso alah makin ka ujuang. Indak lamo lai. Tando-tando alah nampak di masajik, alah mulai bakurang syaf urang nan sumbayang tarawih. Nan biaso makmum sampai malimpah, kini alah tingga duo syaf di muko sajo lai.

Tando-tando lain baso ari rayo alah dakek, lieklah ka pasa, ka mall, toko-toko gadang. Pasti rami dek urang sibuk mancari baju baru nan kadibali untuk dipakai di ari rayo. Induak-induak rami di toko bahan kue, sabab saminggu inyo ka bakalebuik mambuek kue rayo. Sadangkan apak-apak sibuak mancari oto ka perentalan oto.

Mancari oto rental untuak pulang kampuang. Sabab kalau pulang kampuang hanyo bajalan kaki lenggang kaki ayun tangan, apo kato urang kampuang bisuak. Jauh-jauh marantau pulang kampuang jo anak bini indak pakai oto. Beko dikecekan urang, awak marasai iduik di rantau. Jadi bialah barental oto agak saminggu pado kanai cimeeh dek urang kampuang.

Baitu pun Tan Kereang, lapeh luhua inyo maunjua-unjua di musajik raya nan sabana gadang tu. Dari ayia mukonyo, tampak jaleh ado rusuah nan indak takatoan dek mandan Jimbrehe tu. Apokah rusuah ati dek puaso malawan sabab indak makan sahur? Mungkin juo. Atau rusuah ati dek beko sore indak ado urang maajak babuko basamo? Antahlah.

“Tan!” sapo Jimbrehe manyapo Tan Kereang di pintua kalua musajik.

“Apo lai, Jim?” baleh Tan Kereang lamah co jawih litak.

“Den paratian ang dari tadi sanak, baa kok layuah bana badan ang? Indak itu sajo, rono mungko ang pun agak kalam nampak dek den. Apo bana nan ang rusuah an?” tanyo Jimbrehe duduak basampiang-sampiang malapeh panek.

“Ondeh, Jim. Ang batanyo tantang rusuah ati den, kok den sampaian ka waang, lai ka salasai masalah den ko raso e?” baleh Tan Kereang.

“Kok masalah nan ang sampaian, tantu nan partamo jaleh den dangaan dulu permasalahan waang. Sudah tu, aden ko yo indak mode motto pegadaian doh, Tan. Kalau pegadaian keceknyo mengatasi masalah tanpa masalah. Sadangkan aden, kok ang ado masalah, alun tantu bisa den salasian masalah waang tu lai. Tapi bacarito sajo lah ang dulu, beko kito carian jalan kalua e. Apo bana  masalah waang?” Kecek Jimbrehe bantuak motipator nan acok kalua di tipi.

“Ari ka rayo.” Jawek Tan Kereang singkek. Satangah mangaluah.

“Iyo, saminggu ko lai. kalau rayo kan mustinyo bagadang ati kito. Puaso sampai, ibadah Ramadhan cukuik. Basanang-sanang di ari kamanganan. Mujua kok lai sampai ka lepel takwa nan dimukasuik dalam kitab?”

“Ndeh, Jim. Rirayo tibo, pitih indak ado. Jo a kadibali baju baru agak saalai, tarompa baru agak sapasang, kopiah baru, kain saruang agak ciek. Alun nampak gambaran dek den lai, Jim oi,” kaluah Tan Kereang mode tukang rabab kahauihan.

“Ha! Baa kok mode tu, alah atau alun cair Te-Ha-Er, ang?”

“Tehaer? Wayoik, angku Dotor, urang mode awak ko sia nan ka maagiah tehaer?”

“Tantu juragan tampek ang karajo”

“Eh, Jimbrehe, indak sadar sanak, karajo kito baduo tu mode-mode ko sajo nyo mah, hanyo bacarito di koran ko sakali saminggu. Lai karajo namoe ko? Sia juragan kito? Ha, paniang den. Sia nan ka mambayie Tehaer untuk awak?”

“Iyo pulo nak Tan? urang nan mambaco koran ko kok lai namuah mangirim Tehaer ka kito baduo?”

“Ma pulo urang tu namuah. Tehaer inyo se alun juo kalua lai.”

“Oaalah, baa aka lai? Baa ka pulang kampuang kito tu?”

“Tu masalah den ciek lai, Jim. Aden nio rirayo ko pulang kampuang, tapi sampai kini alun tau dima kampuang den tu lai? Baa ka Pulang kampuang?”

“Ha. Yo urang sansai awak. Sado indak punyo awak kiro e.” Pungkeh Jimbrehe. (*)

 

Cagak Utama

Sastra dan Relasi Kekuasaan

Penulis : Donny Syofyan - Dosen Sastra Inggris FIB Unand

Selama manusia masih diperbudak oleh nafsu untuk mendominasi dan menindas, Marxisme dan semua aka

Kampus

Ketika Pengusaha Media menjadi Politisi

Penulis : Mis Fransiska Dewi - Calon Anggota Unit Kegiatan Pers Mahasiswa Genta Andalas

Di zaman Orde Reformasi, media massa menjadi sangat liberal (bebas), bahkan berubah menjadi kekua

Langkan

Masyarakat Ikut Awasi Perilaku Anak

Penulis : Eka Rianto - Padang Ekspres

Orang tua tentu memiliki keterbatasan dalam menjaga anak mereka. Apalagi ketika anak bermain bers

Cerpen

Pertemuan Ajo Siman dan Jon Ladiang

Penulis : Rio Rinaldi - Dosen FKIP Universitas Bung Hatta

Suatu kali, Ajo Siman pulang sambil menggerutu di jalan. Hatinya palak karena acap dimarahi induk

Remaja

Berusaha Sampai Mati

Penulis : Indra Junaidi

Aku bagaikan menggantangkan lautan
Berlayar di atas samudera tanpa batas
Membuih karn

Remaja

Kehilangan Berlian dalam Genggaman

Penulis : Ahmad Zul Hilmi

Aku masih ingat ketika guru favoritku waktu SD berkata. “Jangan pernah memutuskan hubungan

Cagak Utama

Kuda Minangkabau Mengdongkak Zaman

Penulis : Deddy Arsya - Bukan Pengamat Kuda

Bagi masyarakat zaman lampau, kuda menduduki posisi yang terhormat. Binatang satu ini lambang mas